Valentine"s Day Special

Valentine’s Day Special!

C.Laldinmawia

Kan hma lawk February ni 14 mai hian nula tlangval inngaizawng te tana ni special bik ni a an ngaih Valentines Day chu kan lo thleng leh dawn ta reng mai. He ni hi a lo in tanna leh lo chhuahna lam sawi tur ka hre lem lo (Ka ngaihven lem lo bawk nen). Chutih rual erawh chuan keini India hmarchhak State kilkhawr tak atang pawha kan lo buaipui ve viau thin thil a nih si avang leh kan thalai tam tak te hun hman thin dan an sawi thin atang te hian thil pakhat sawi ve tul in ka hria a ni.

Kan sawi tak ang khan February ni 14 a lo hnaih hi chuan nula, tlangval, tleirawl te atanga phan chang fe tawh thleng pawhin nghakhlel tak tak kan tam leh viau awm e! Inngaizawngte tana ni bik ni a ngaia lenchhuah dun emaw, midangte leng ve lem lo a hun hman dun emaw kan chak viau thin niin alang. Tin, thenkhat lahin nupa kawpchawi ni tura inkutsuih ni (inneihni) atana hman tum leh hmang tawh te pawh an lo awm ve zel bawk a. Engpawh nise heng zawng zawng hi han sawisel ngawt tur a awm hran lo ve. Pathian mi siam danah mipa leh hmeichhe inkara induh tawnna hmangaihna hi nupa pumkhat ni tura kalkawng pawimawh tak a ni a. Amah chawimawi tur chhungkaw dinna tura leilung  piantirh ata hmangaihna a siam tih famkimna tur a nih miau avangin a zahawm a, a hlu em em bawk a mahni duhthu leh nuam tih zawnga tal pui viau na tur chi a ni lo ang.

Chutih mek lai chuan Valentine’s Day avanga kan thalai tam tak te hun hman dan an sawi thin te hi a tak tak a nih chuan a pawi dawn hle mai. He ni a lo thlen dawn hian damdawi zuar ho chuan damdawi hralh nuam tak a awm ziah ti a fiamthu ti tak deuha an sawi thin te hian ngaihtuahna a va ti thui em! A ruh langa sawi chuan he ni ah hian kan thalaite zingah sex a hluar hle niin a rin theih. Chuvang chuan Aw nula! Aw tlangval! Valentine’s Day hma zawng pawha i invawn thianghlim tawh na kha engvangin nge he ni ah hian i phalrai viau kher a tul na ni ang? Hmangaihna dik tak Krista tel ve na tlak hian sex hmang turin a nawr luih che i ring reng reng em le. He ni avanga i nuna damchhung ser reh theilo insiam tur hian hmangaihna der bual at in awm lo hram ang che. Hmangaihna dik chuan insumtheihna te, dawhtheihna te a keng tel tlat zawk tur a ni ang. Chuvangin duhthlanna dik hmang turin inbuatsaih la Valentine’s day avanga i hnawl hnu Krista hma ah i la ding leh dawn a ni tih hre reng la, insum theih hi thlarau rah a nih ang ngeiin lo insum hram hram zawk teh khai!

Tin, Pathian hmangaihna hai der lui tlat chung hian chuai leh mai tur hmangaihna lipui hleuh tur erawh chuan kan inbuatsaih viau lawi si em! Pathian kan hmangaih mai hian kan kawppui te, kan ngaihzawng te kan hmangaih tel a ni tih hre reng ila. He ni hi hmangaih te pual in kan ti ta sa sa Lal Isua Krista, englai maha min phatsan ve ngailotu hi hmangaih let na ni ah i hmang hlauh zawk ang u. A tawp berah chuan Valentine’s day a ni emaw hapta dang leh ni thar zel pawh lo herchhuak rawh se, Lalpa tel ve na tlak loh programme hi engmah inghahna tlak leh hlimna tluan tling a awm lo ve.